ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានជំរុញដោយយកឆ្នាំ២០២៣ ជាឆ្នាំដាក់ចេញយុទ្ធនាការ «ទស្សនាកម្ពុជា» ដើម្បីជំរុញវិស័យទេសចរណ៍កម្ពុជា និងរៀបចំស៊ីហ្គេមឆ្នាំ២០២៣ ដោយរួមគ្នាលើកកំពស់កិត្តិយស និងបង្ហាញពីវប្បធម៌ប្រពៃណី និងអត្តសញ្ញាណជាតិទៅកាន់ពិភពលោក។

ថ្លែងក្នុងទិវាជាតិទីក្រុងស្អាតលើកទី១១ នៅរសៀលថ្ងៃទី២៧ ខែកុម្ភៈ ឆ្នាំ២០២៣ នេះនៅរាជធានីភ្នំពេញ សម្ដេចតេជោ ហ៊ុន សែន បានជំរុញដល់ពលរដ្ឋគ្រប់រូបចូលរួមថែរក្សាបរិស្ថានអនាម័យ ចូលរួមបង្ហាញនូវប្រពៃណីវប្បធម៌ជាតិ ដើម្បីលើកមុខមាត់ជាតិកម្ពុជាទៅកាន់ពិភពលោក។

សម្ដេចបានបន្ថែមថា ការរក្សាអនាម័យ និងមុខមាត់ជាតិគឺត្រូវធ្វើចាប់ពីពេលនេះទៅថ្ងៃអនាគតបន្តទៀតព្រោះកម្ពុជាជាទឹកដីរបស់ប្រជាពលរដ្ឋគ្រប់រូប៕